बिहिबार, २२ असोज २०८३
बिहिबार, २२ असोज २०८३
बिहिबार, २२ असोज २०८३ · राजनीति
काठमाडौं, असोज २२ । नेपाल कम्युनिष्ट पार्टी (एमाले) को स्थायी कमिटी बैठक शुरु भएको छ ।
बिहीवार पार्टीको केन्द्रिय कार्यालय ललितपुरको च्यासलमा वर्तमान राजनीतिक अवस्था र पार्टीको आन्तरिक रणनीतिबारे छलफल गर्न डाकिएको यो बैठकमा पूर्वराष्ट्रपति विद्यादेवी भण्डारीको उपस्थितिले राजनीतिक वृत्तमा विशेष चासो बढाएको हो । पार्टी अध्यक्ष केपी शर्मा ओलीसहित शिर्ष नेताहरूको उपस्थिति रहेको बैठकमा मुलुकको समसामयिक राजनीतिक परिस्थिति र पार्टीको आगामी कार्यदिशाबारे गहन छलफल हुने कार्यसूची रहेको छ । एमाले स्थायी कमिटीका सदस्यहरूकाअनुसार बैठकमा सांगठनिक सुदृढीकरण र आगामी दिनमा पार्टीले खेल्नुपर्ने भुमिकाका विषयमा मुख्य रूपमा विचार–विमर्श गरिनेछ । पार्टीकी वरिष्ठ नेता एवं पूर्वराष्ट्रपति विद्यादेवी भण्डारीको बैठकमा सहभागितालाई राजनीतिक रूपमा अर्थपूर्ण मानिएको छ । बैठकमा पछिल्लो समय विकास भएका राजनीतिक घटनाक्रम, सरकारको कार्यसम्पादन र प्रतिपक्षी दलका रूपमा एमालेले उठाउनुपर्ने मुद्दाहरूका बारेमा पनि नेताहरूले आफ्ना धारणा राख्नेछन् । बैठकको निर्णयपछि पार्टीले औपचारिक रूपमा आफ्ना धारणा सार्वजनिक गर्ने तयारी गरेको छ । च्यासलस्थित मुख्यालयमा जारी यस बैठकले पार्टीको आगामी नीति र रणनीति तय गर्ने अपेक्षा गरिएको छ । –न्युज एजेन्सी नेपाल
