रास्वपा पदाधिकारी चयनका लागि आज मतदान

काठमाडौँ, असार १२ ।  राष्ट्रिय स्वतन्त्र पार्टी (रास्वपा) को नयाँ नेतृत्व र पदाधिकारी चयनका लागि आज (शुक्रबार) बिहान १० बजेदेखि मतदान सुरु हुँदैछ। पहिलो चरणको केन्द्रीय सदस्य निर्वाचनको नतिजा सार्वजनिक भएसँगै निर्वाचन आयोगले दोस्रो चरणअन्तर्गत पदाधिकारी चयनको प्रक्रिया अघि बढाएको हो।

पार्टीको आन्तरिक लोकतन्त्रलाई मजबुत बनाउने उद्देश्यका साथ भइरहेको यस निर्वाचनमा दोस्रो चरणअन्तर्गत महत्वपूर्ण ६ वटा पदका लागि मतदान हुन लागेको छ। निर्वाचन समिति भद्रपुरका अनुसार आज एक खुला उपसभापति, एक महिला उपसभापति, एक खुला महामन्त्री, दुई खुला सहमहामन्त्री र एक महिला सहमहामन्त्री पदका लागि तीव्र प्रतिस्पर्धा हुने देखिन्छ।

रास्वपाको परिमार्जित विधानअनुसार पार्टीको केन्द्रीय कमिटीमा कुल १९ जना पदाधिकारी रहने व्यवस्था छ। जसमध्ये पार्टीको सर्वोच्च कमान्ड अर्थात् सभापति पदमा रवि लामिछाने यसअघि नै निर्विरोध निर्वाचित भइसकेका छन्। त्यस्तै, पार्टीको महत्त्वपूर्ण 'वरिष्ठ नेता' पदमा  प्रधानमन्त्री बालेन्द्र शाह (बालेन) मनोनीत हुने निश्चित भएको छ। 

पार्टी विधानमा कुल तीन उपसभापति, दुई महामन्त्री, पाँच सहमहामन्त्री, एक प्रवक्ता, तीन सहप्रवक्ता, एक कोषाध्यक्ष र दुई सहकोषाध्यक्ष रहने व्यवस्था छ। आज निर्वाचन हुने ६ वटा पद बाहेकका बाँकी अन्य सिटहरू भने पार्टीको समावेशी सिद्धान्त र क्लस्टरका आधारमा मनोनयनमार्फत पूर्ति गरिने निर्वाचन समितिले जनाएको छ।

नयाँ राजनीतिक संस्कारको वकालत गर्दै आएको रास्वपाको यो महाधिवेशन र पदाधिकारी चयनको प्रक्रियालाई आम नागरिक र राजनीतिक वृत्तले चासोका साथ हेरेका छन्। आज हुने मतदानले पार्टीलाई आगामी दिनमा हाँक्ने नयाँ, ऊर्जावान् र सक्षम सारथिहरूको टुंगो लगाउनेछ। मतदानको नतिजा आजै रातिसम्म सार्वजनिक गर्ने तयारी गरिएको छ।