काठमाडौंमा फेसलेस ट्राफिक व्यवस्थापन सुरु: सिसिटिभी निगरानीबाटै कारबाही हुने

काठमाडौं, वैशाख २७ । काठमाडौं उपत्यका ट्राफिक प्रहरी कार्यालयले डिजिटल प्रविधिमार्फत ट्राफिक व्यवस्थापन गर्ने तयारी गरिरहेको जनाएको छ । कार्यलयले ट्राफिक नियम उल्लंघन गर्नेहरुलाई सिसिटिभी निगरानीमार्फत कारबाही गर्नेगरि तयारी गरेको हो ।

परीक्षण स्वरुप कार्यलयले काठमाडौको थापाथली क्षेत्रमा ‘फेसलेस ट्राफिक म्यानेजमेण्ट सिस्टम’ लागू गरिसकेको कार्यलयका प्रमुख प्रहरी वरिष्ठ उपरीक्षक नवराज अधिकारीले जानकारी दिनुभयो । कार्यलयले आईतवार आयोजना गरेको समिक्षात्मक कार्यक्रममा उहाँले सार्वजानिक विदाको दिन थापाथली क्षेत्रमा हाल सिसिटिभी निगरानीमार्फत नियम उल्लंघन गर्नेलाई कारबाही गर्ने गरिएको बताउनु भयो । उहाँकाअनुसार ट्राफिक नियम उल्लंघन, मापसे, तिब्र गति र लेन अनुशासनविरुद्ध कार्यलयले कडा कारबाही गर्ने गरेको छ । ट्राफिक प्रहरीले लेन अनुशासन, ट्राफिक लाइट पालना, ‘ड्रिङ्क एण्ड ड्राइभ’ र ‘ड्रग्स एण्ड ड्राइभ’ नियन्त्रणलाई प्राथमिकतामा राखेको उहाँले बताउनु भयो । ओभरस्पिड नियन्त्रण र सडक सुरक्षालाई केन्द्रमा राखेर काठमाडौंको ट्राफिक जामलाई व्यवस्थित गर्न ‘डेस्टिनेसन क्लियर’ प्रणाली लागू गरेको उहाँले जानकारी दिनुभयो । उहाँकाअनसार सार्वजानिक यातयातलाई मर्यादित बनाउन सवारीसाधनमा सिसिटिभी, ड्यास क्यामेरा र जीपीएस अनिवार्य गरिएको छ । ती उपकरण नराख्ने सवारीलाई सञ्चालन गर्न रोक लगाउने उहाँले बताउनु भयो । राइड शेयर सेवामा प्रयोग हुने मोटरसाइकलमा समेत एसओएस बटन र क्यामेरा अनिवार्य बनाउन लागिएको उहाँले जानकारी दिनुभयो । ट्राफिक प्रहरीले लापरवाहीपूर्वक सवारी चलाउने ३१ चालकको लाइसेन्स ६ महिनाको लागि निलम्वन गरेको छ । लाइसेन्स निलम्वनका लागि यातायात व्यवस्था कार्यालयले निलम्वन गरिसकेको उहाँले जानकारी दिनुभयो । पटक–पटक नियम उल्लंघन गर्नेलाई सजग गराउन निलम्वन गरिएको उहाँले बताउनु भयो । उहाँले एकीकृत बसपार्क प्रणाली लागू गरि बसपार्कबाट मात्रै लामो दूरी र मझौला दूरीका सवारी साधनहरू छुट्ने व्यवस्था गरिएको पनि जानकारी दिनुभयो । जेनजी आन्दोलनमा क्षति पुगेको विभिन्न ३७ वटा ट्राफिक प्रहरी कार्यालयहरूलाई मर्मत गर्दै ट्राफिक व्यवस्थापनलाई अझ सशक्त रूपमा अगाडि बढाएको उहाँको भनाई छ । 

उहाँले भन्नुभयो, ‘ हामीले ट्राफिक नियमको पालनालाई कडाइका साथ अगाडि लगेका छौँ । यसमा सबैभन्दा बढी लेन अनुशासन, ट्राफिक नियम, लाइटको पालना, ड्रिङ्क एण्ड ड्राइभ, ४ डी भन्छौँ ड्रिङ्क एण्ड ड्राइभ एण्ड ड्रग्स एण्ड ड्राइभलाई पूणरूपले निषेध गर्नेगरी र ओभर स्पिड कन्ट्रोल र रोड सेफ्टी, सवारी दुर्घटना न्यूनिकरणका सवालमा काठमाडौंको ट्राफिक जामलाई थप व्यवस्थित कसरी गर्न सकिन्छ भनेर हामीले काम गरिहेको छौँ । त्यसको लागि डेस्टिनेसन तय गरेर त्यसलाई क्लियर गर्ने गरि ट्राफिक जामलाई थप व्यवस्थित गर्नेगरी अगाडि बढिरहेका छौँ । साथै प्रविधि मैत्री ट्राफिकको लागि पनि तयारी भइरहेको छ । हामीले परीक्षणको रूपमा थापाथलीमा यसको प्रयोग गरिरहेका छौँ । अहिले त्यहाँ बिदाको दिनहरू विशेषगरी शनिवार आईतवार ट्राफिक पुलिस हुँदैन । त्यहाँ हामीले सिसिटिभी मनिटरबाट ट्राफिक नियम मिच्नेलाई कारबाही गरिराखेका छौँ । यसलाई अब फ्रेश ट्राफिक लाइट छ, त्यहाँ फेसलेस ट्राफिक म्यानेजमेण्ट सिस्टम, वन्ली प्रविधिको माध्यमबाट डिजिटल माध्यमबाट मात्रै ट्राफिक म्यानेजमेन्ट गर्ने गरी अगाडि बढ्ने कुरामा अहिलेको सरकारको पनि पूर्ण रूपले हामीलाई साथ र सहयोग छ । यस सम्बन्धमा हामी अगाडि बढिरहेका छौँ । यस्तै बसको स्पिड कति छ, यी सबै मनिटर गर्नको लागि प्रत्येक गाडीहरूमा सार्वजनिक सवारी साधनहरूमा सिसिटिभी मनिटर ड्यासबोर्ड क्यामेरा र ब्याक साइट र फ्रन्ट साइट त्यो अनिवार्य रूपमा हुनुपर्ने सरकारको नीति अनुरूप हामी अगाडि बढिसकेको छोँ । त्यो नराख्ने सवारी साधनहरूको हकमा हामीले सवारी साधनहरूलाई होल्ड गर्दैछौँ । त्यो नराखिकन चलाउन नपाउने गरी होल्ड गर्दैछौँ किनभने कार्यालय प्रमुखहरूलाई पनि हामीले यहाँ किन बोलाएका छौँ भने यो विषयमा तपाईँहरूलाई पनि इन्स्ट्रक्सन निर्देशनको लागि हामीले बोलाएका हौँ। प्रत्येक सवारी साधनहरूमा सार्वजनिक सवारी साधनहरूमा सिसि क्यामरा, ड्यासबोर्ड क्यामरा अनिवार्य रूपमा हुनुपर्नेछ, जिपिएसहरू हुनुपर्नेछ, यो राइडर सर्भिसका मोटरसाइकलहरूमा बाइकहरूमा एसओएस बटन क्यामरा अनिवार्य रूपमा हुनुपर्ने गरी अगाडि बढाएका छौँ । लापरवाहीपूर्ण सवारी साधन चलाउनेहरूलाई हामीले यही महिना मात्रै ३१ जना सवारी चालकहरूको सवारी चालक अनुमति पत्र निलम्बनको लागि लेखेर पठाएका छौँ । लापसे गरेर चलाउने, मापसे गरेर चलाउने, १५–२० पटक भन्दा बढीसँग लापरवाहीपूर्ण चलाउनेहरूलाई हामीले लाइसेन्स निलम्बनको गरेका हौँ, जसले अत्यन्त लापरवाही चलाउँछ भने उहाँलाई सवारी चलाउने छुट छैन । त्यसको लागि ३१ वटा सवारी चालक अनुमति पत्र ३१ जनाको हामीले निलम्वनको लागि यातायात व्यवस्था कार्यालयमा लेखेर पठाइसकेका छौँ ।’ 

२६ करोड १९ लाख रुपैयाँभन्दा बढी राजश्व संकलन
कार्यलयका सूचना अधिकारी प्रहरी उपरीक्षक नरेशराज सुवेदीले चालु आर्थिक वर्षमा ट्राफिक प्रहरीले ३ लाख ७३ हजार ५ सय ६२ चालकलाई कारबाही गरेको जानकारी दिनुभयो । त्यसबाट २६ करोड १९ लाख रुपैयाँभन्दा बढी राजश्व संकलन भएको उहाँले बताउनु भयो । सबैभन्दा बढी कारबाही मोड्न निषेध गरिएको ठाउँमा उल्लंघन गर्ने ३७ हजार ४७२, लेन अनुशासन उल्लंघन गर्ने २३ हजार ९८४, मापसेमा परेका २३ हजार ४८, तीव्र गतिमा सवारी चलाउने २३ हजार ७७२ र रातो बत्ती उल्लंघन गर्ने २८ हजार ३०८ जनामाथि कारबाही गरिएको उहाँले जानकारी दिनुभयो । यस्तै, इ–चलान प्रणालीमार्फत मात्रै ४ करोड २८ लाख रुपैयाँभन्दा बढी राजस्व संकलन भएको बताउनुभयो । जरिवाना नतिर्ने २ लाख ६१ हजार चालकको विवरण थप कारबाहीका लागि यातायात व्यवस्था विभागमा पठाइएको उहाँको भनाई छ । उहाँकाअनुसार १८ करोड रुपैयाँभन्दा बढी कारबाहीको जरिवाना बापतको शुल्क उठ्न बाँकी रहेको छ । 

उहाँले भन्नुभयो, ‘मापसेबाट २३ हजार ४८ कारबाही भएका छन् भने लेन अनुशासन उल्लंघन गर्ने २३ हजार ९८४ कारबाहीमा परेका छन् । त्यसैगरी तीव्र गतिमा २३ हजार ७७२, रातो बत्तीमा सवारी चलाउने २८ हजार ३०८, स्वरुप परिवर्तन १ हजार ४५०, बढी भाडा लिने ८ सय ९०, लापसे १२४, यान्त्रिक अवस्था ठीक नभएको २ हजार ८३१, मोड्न निषेध गरिएको ३७ हजार ४७२, त्यसैगरी हर्न निषेध गरिएकोमा ६ हजार २५७, डबल चालक हुनुपर्नेमा सिंगल चालक मात्र पाइएको ३५० र सवारी चालक अनुमति पत्र नभइकन पनि सवारी साधन चलाउने १० हजार ४८९ वटा सवारीलाई कारबाही गरेका छौँ । जम्मा हामीले ३ लाख ७३ हजार ५ सय ६२ सवारी चालकलाई यो चालु आर्थिक वर्षमा कारबाही गरेका छौं भने त्यसबाट २६ करोड १९ लाख ३९ हजार ९७७ रुपैयाँ चाहिँ राजस्व कोषमा दाखिला भएको छ ।  १८ करोड रुपैयाँभन्दा बढी कारबाहीको जरिवाना बापतको शुल्क राजश्व कोषमा दाखिला नभएको पाइएको छ । हामीले यातायात व्यवस्था विभागसँग समन्वय गरेर करिब २ लाख ६१ हजार त्यस्तो जरिवाना नतिर्ने सवारी चालकहरुको विवरण यातायात व्यवस्था कार्यालयमा पठाएका छौं । यातायात व्यवस्था विभागबाट त्यस्ता सवारी चालकको सम्बन्धमा पनि थप कारबाही प्रक्रिया अघि बढिसकेको छ । इ–चलानबाट पनि हामीले कारबाही गर्दा ४ करोड ४ करोड २८ लाख ५५ हजार ७ रुपैयाँ इ–आर्थिक वर्षको अहिलेसम्म राजस्व संकलन गरेका छौँ ।’ 

उहाँले पछिल्लो समय तोकिएकोभन्दा बढी भाडा असुल्ने प्रवृत्ति बढेपछि निगरानी र कारबाही तीव्र बनाइएको पनि जानकारी दिनुभयो । पुराना तथा प्रदुषण फैलाउने सवारीसाधनमाथि यान्त्रिक परीक्षण र प्रदुषण जाँच कडाइ गरिएको उहाँको भनाई छ । —न्युज एजेन्सी नेपाल