नवनिर्वाचित अध्यक्ष श्रेष्ठद्वारा पदभार ग्रहण

काठमाडौं, वैशाख २४ ।  नेपाल उद्योग वाणिज्य महासंघका नवनिर्वाचित अध्यक्ष अञ्जन श्रेष्ठले पदबहाली गर्नुभएको छ । बिहीवार महासंघ कार्यालयमा उहाँले पदबहाली गर्नुभयो । अध्यक्ष श्रेष्ठसहितका पदाधिकारीहरुले समेत पदबाहाली गर्नुभएको छ ।

पदबाहालीपछि बोल्दै अध्यक्ष श्रेष्ठले निजी क्षेत्रको मनोबल उकास्न आफ्नो कार्यकालमा काम गर्ने बताउनु भयो । उहाँले निजी क्षेत्रको मनोबल बढाउन सरकारसँग समन्वय गरेर विभिन्न नीतिगत सुधार गर्ने समेत बताउनु भयो । उहाँकाअनुसार निजी क्षेत्रलाई प्रोत्साहन र लगानी सुरक्षाको प्रत्याभुति दिन सरकार गम्भीर बन्नुपर्छ । निजी क्षेत्रको प्रवद्र्धन तथा सुरक्षा सम्बन्धी प्रस्ताव मन्त्रिपरिषद्बाट पारित भइसकेकोतर्फ लक्षित गर्दै उहाँले अब यसको पूर्ण कार्यान्वयन हुनुपर्नेमा जोड दिनुभयो । श्रेष्ठले अहिले बजारमा माग अत्यन्त कमजोर रहेको, जनताको क्रयशक्ति घटेको तथा अर्थतन्त्रमा पुँजी परिचालन सुस्त भएको अवस्था रहेको बताउनु भयो । उहाँले पुँजी परिचालन बढाउन सरकारले आगामी बजेटबाट आवश्यक कदम चाल्नुपर्नेमा जोड दिनुभयो । 

अध्यक्ष श्रेष्ठकाअनुसार अहिले विशेषगरी साना तथा मझौला उद्योगहरू अहिले सबैभन्दा बढी समस्यामा छन् । बैंकिङ प्रणालीमा प्रशस्त लगानीयोग्य रकम भएपनि साना उद्योगहरूले आवश्यक कर्जा र लगानी पाउन नसकेको अवस्था छैन । विगतमा सहकारी क्षेत्रले करिव ६ खर्ब रुपैयाँ पुँजी परिचालन गर्दै आएको तर सहकारी संकटपछि साना उद्योगमा लगानी अभाव चुलिएको उहाँको भनाइ छ । अध्यक्ष श्रेष्ठले अब बैंकहरूले साना तथा मझौला उद्योगमा लगानी कसरी विस्तार गर्ने भन्ने विषयमा स्पष्ट रणनीति बनाउनुपर्ने आवश्यकता औँल्याउनु भयो । –न्युज एजेन्सी नेपाल