मलेसियामा १६ वर्षमुनिका बालबालिकालाई सामाजिक सञ्जाल प्रयोगमा प्रतिबन्ध

काठमाडौं, जेठ १८ । मलेसियाले १६ वर्षभन्दा कम उमेरका बालबालिकाको सामाजिक सञ्जाल प्रयोगमा कडाइ गर्दै नयाँ नियम लागू गरेको छ। जुन १, २०२६ देखि लागू भएको यस व्यवस्थाअनुसार १६ वर्षमुनिका बालबालिकाले सामाजिक सञ्जालमा खाता खोल्न वा प्रयोग गर्न पाउने छैनन्।

नयाँ नियमअनुसार फेसबुक, इन्स्टाग्राम, टिकटक, यूट्यूब  लगायतका प्लेटफर्महरूले प्रयोगकर्ताको उमेर प्रमाणीकरण अनिवार्य रूपमा गर्नुपर्नेछ। नियम पालना नगर्ने कम्पनीहरूलाई १ करोड रिंगिट (करिब २१ करोड नेपाली रुपैयाँभन्दा बढी) सम्म जरिवाना हुन सक्ने व्यवस्था गरिएको छ।

विश्वभर बालबालिकाको अनलाइन सुरक्षा, साइबर बुलिङ, मानसिक स्वास्थ्यमा पर्ने असर तथा सामाजिक सञ्जालको लतबारे चिन्ता बढिरहेका बेला मलेसियाले यो कदम चालेको हो। सरकारले यस निर्णयको उद्देश्य बालबालिकालाई इन्टरनेटबाट टाढा राख्नु नभई हानिकारक तथा अनुपयुक्त सामग्रीबाट सुरक्षित गर्नु रहेको जनाएको छ।

मलेसियाको सञ्चार आयोगका अनुसार यस नियमले साइबर बुलिङ नियन्त्रण गर्न, अश्लील तथा अनुपयुक्त सामग्रीबाट बालबालिकालाई जोगाउन र मानसिक स्वास्थ्यमा नकारात्मक प्रभाव पार्ने सामाजिक सञ्जालको असर कम गर्न सहयोग पुग्ने अपेक्षा गरिएको छ।

सरकारले स्पष्ट पारेको छ कि यदि कुनै बालबालिकाले गलत जानकारी प्रयोग गरेर खाता खोलेको पाइए पनि अभिभावकलाई कुनै सजाय वा जरिवाना गरिने छैन।

यता सामाजिक सञ्जाल कम्पनीहरूले भने उमेर प्रमाणीकरणको नयाँ प्रणाली कसरी कार्यान्वयन गर्ने भन्नेबारे हालसम्म स्पष्ट जानकारी दिएका छैनन्। सरकारद्वारा आवश्यक प्राविधिक सुधारका लागि केही अतिरिक्त समय प्रदान गरिएको बताइएको छ।