बुधबार, २३ वैशाख २०८३
बुधबार, २३ वैशाख २०८३
बुधबार, २३ वैशाख २०८३ · अन्तर्राष्ट्रिय
सिड्नी, वैशाख २३ । मध्यपूर्वमा बढ्दो राजनीतिक तथा सैन्य तनावको सिधा असर अस्ट्रेलियाली भान्छा र यातायातमा पर्न थालेको छ। अस्ट्रेलियन ब्युरो अफ स्ट्याटिस्टिक्स (एबीएस) ले मंगलबार सार्वजनिक गरेको तथ्याङ्कअनुसार इन्धनको मूल्यमा भएको भारी वृद्धिका कारण अस्ट्रेलियामा घरायसी खर्चमा उल्लेख्य बढोत्तरी भएको हो।
एबीएसका अनुसार गत मार्च महिनामा मात्रै घरायसी खर्च १.६ प्रतिशतले बढेको छ। यो वृद्धि अघिल्ला महिनाहरूको तुलनामा निकै तीव्र हो; जनवरीमा ०.२ र फेब्रुअरीमा ०.३ प्रतिशतले मात्र खर्च बढेको थियो। सन् २०२४ को मार्चको तुलनामा हालको खर्च ६.३ प्रतिशतले बढी रहेको तथ्याङ्कले देखाएको छ।
एबीएसका व्यवसाय तथ्याङ्क प्रमुख टम लेका अनुसार यातायात लागतमा ५.१ प्रतिशतले वृद्धि भएपछि समग्र घरायसी खर्च बढ्न पुगेको हो। मार्चको अन्त्यतिर इन्धनको मूल्य उच्च बिन्दुमा पुगेका कारण उपभोक्ताहरू प्रत्यक्ष मारमा परेका छन्।
बढ्दो मूल्यका कारण अस्ट्रेलियाली उपभोक्ताहरूको दैनिक जीवनशैली र व्यवहारमा समेत परिवर्तन देखिएको छ। सवारी धनीहरूले एकैपटक ट्याङ्की भर्नुको सट्टा पटक-पटक थोरै परिमाणमा तेल भर्ने गरेका छन्। मार्चमा इन्धनको मूल्य ३२.८ प्रतिशतले बढेपछि खरिद परिमाणमा १.३ प्रतिशतको गिरावट आएको छ।
निजी सवारी साधनको सट्टा धेरै मानिसहरूले सार्वजनिक यातायातको प्रयोग गर्न थालेका छन्, जसले यातायात खर्चको ढाँचामा परिवर्तन ल्याएको छ। साथै, विश्वव्यापी आपूर्ति शृङ्खलामा अवरोध आउन सक्ने आशंकाका कारण सर्वसाधारणले सावधानीस्वरूप खाद्यान्न भण्डारण (स्टक) गर्न थालेका छन्। यसका परिणामस्वरूप खाद्यान्नको माग बढ्दै गएको छ र खाद्यान्न खर्चमा १.७ प्रतिशतको वृद्धि देखिएको छ।
लगातार छैटौँ त्रैमासिक वृद्धि
तथ्याङ्कअनुसार मार्च त्रैमासिकमा घरायसी खर्चको कुल परिमाण ०.७ प्रतिशतले बढेको छ, जुन लगातार छैटौँ त्रैमासिक वृद्धि हो। वार्षिक रूपमा २.८ प्रतिशतको यो वृद्धि सन् २०२३ को मध्ययताकै सबैभन्दा बलियो वार्षिक वृद्धि मानिएको छ। विशेषगरी स्वास्थ्य र खाद्यान्न जस्ता अत्यावश्यक क्षेत्रमा भएको खर्च वृद्धिका कारण सर्वसाधारणको बचतमा समेत चाप परेको विज्ञहरूको विश्लेषण छ।
