विश्वमै सबैभन्दा धेरै कफी पिउने देश, यस्ताे छ कफी र स्वास्थ्यको अनौठो सम्बन्ध

काठमाडौं, चैत २० । विश्वभरका करोडौँ मानिसहरूको दिनको सुरुवात एक कप तातो कफीबाट हुने गर्छ। कफी धेरैको जीवनशैलीको अभिन्न हिस्सा बनिसकेको छ। कतिपयले यसलाई स्वास्थ्यका लागि फाइदाजनक मान्छन् भने कतिपयले हानिकारक। तर, के तपाईँलाई थाहा छ? संसारमा एउटा यस्तो देश पनि छ, जहाँ कफी केवल एउटा पेय मात्र नभएर दीर्घायुको रहस्यसमेत मानिन्छ।

हालैको एक प्रतिवेदन अनुसार, फिनल्यान्ड विश्वमै सबैभन्दा धेरै कफी खपत गर्ने देश बनेको छ। चाखलाग्दो कुरा के छ भने, यहाँका मानिसहरू विश्वकै सबैभन्दा खुसी र लामो आयु बाँच्नेहरूमा गनिन्छन्।

इन्टरनेशनल कफी अर्गनाइजेसनको तथ्यांक अनुसार, फिनल्यान्डमा एक व्यक्तिले औसतमा वर्षभरि करिब १२ किलोग्राम कफी पिउने गर्छन्। त्यहाँ कफी पिउनु एउटा संस्कृतिकै रूपमा स्थापित भइसकेको छ। कफी ब्रेक, जसलाई त्यहाँ 'Kahvitauko' भनिन्छ, त्यसलाई कार्यालय होस् वा घर, कानुनी रूपमै महत्त्व दिइएको छ। फिनल्यान्डका मानिसहरू दिनमा औसत ४ देखि ५ कप कफी पिउँछन्, जुन विश्वका अन्य देशको तुलनामा निकै धेरै हो।

वैज्ञानिक अनुसन्धानहरूले सन्तुलित मात्रामा कफीको सेवन स्वास्थ्यका लागि वरदान साबित हुन सक्ने देखाएका छन्। कफीमा हुने एन्टीअक्सिडेन्ट्सले शरीरका कोषहरूलाई क्षति हुनबाट जोगाउँछ। फिनल्यान्डका बासिन्दाहरूको सक्रिय जीवनशैली र कफीका गुणहरूलाई उनीहरूको दीर्घायुको कारण मानिन्छ। अध्ययनहरूका अनुसार नियमित कफी सेवनले टाइप-२ मधुमेह, पार्किन्सन र अल्जाइमर जस्ता गम्भीर रोगहरूको जोखिम कम गर्न मद्दत पुर्‍याउँछ।

कफीमा पाइने क्याफिनले आलस्य हटाउने मात्र नभई मस्तिष्कको कार्यक्षमतामा पनि सुधार ल्याउँछ। ठिक्क मात्रामा कफी पिउँदा मुटु सम्बन्धी रोगहरूको खतरा कम हुने प्रतिवेदनले औँल्याएको छ। फिनल्यान्डका मानिसहरू प्रायः आफ्नो कफीमा चिनी वा क्रिमको धेरै प्रयोग गर्दैनन्, जसले गर्दा उनीहरूले कफीको प्राकृतिक लाभ पूर्ण रूपमा प्राप्त गर्छन्। यही कारणले गर्दा त्यहाँका मानिसहरू मानसिक र शारीरिक रूपमा बढी स्वस्थ र फिट देखिन्छन्।