भक्तपुर, जेठ २१ । भक्तपुर नगरपालिका–लिवालीस्थित ख्वप्रिङ्ग इङ्लिस सेकेण्डरी स्कुलमा भीषण आगलागी हुँदा विद्यालय भवनमा ठूलो क्षति पुगेको छ। विद्युत् सर्टका कारण भएको भनिएको उक्त आगलागीबाट विद्यालयको दुई तला र पाँच वटा कक्षा कोठाहरू पूर्ण रूपमा नष्ट भएका छन्।
विद्यालयका प्रधानाध्यापक विनोद प्रजापतिका अनुसार आगलागीबाट करिब ५० लाख रुपैयाँ बराबरको भौतिक क्षति भएको प्रारम्भिक अनुमान गरिएको छ। घटनालगत्तै प्रहरी वृत्त जगातीको टोलीले घटनास्थल पुगेर क्षतिको विस्तृत विवरण सङ्कलन कार्य जारी राखेको छ।
आगलागी नियन्त्रणमा आएसँगै विद्यालय प्रशासनले जलेका सामग्रीहरू हटाउने र सरसफाइको काम तीव्र गतिमा अघि बढाएको छ। विद्यार्थीहरूको पठनपाठन धेरै दिन अवरुद्ध हुन नदिने गरी वैकल्पिक व्यवस्थापन र पुनः सञ्चालनको तयारी भइरहेको विद्यालय प्रशासनले जनाएको छ।
