सोमबार, १८ जेठ २०८३
सोमबार, १८ जेठ २०८३
आइतबार, २२ चैत २०८२ · समसामयिक
काठमाडौं, चैत्र २२ । नासाको ऐतिहासिक 'आर्टिमिस २' अभियानअन्तर्गत चन्द्रमातर्फको यात्रामा रहेका अन्तरिक्षयात्रीहरूले पृथ्वीको आधा बाटो पार गरेपछि खिचेको अत्यन्तै आकर्षक र उच्च गुणस्तरको तस्बिर नासाले सार्वजनिक गरेको छ।
सन् १९७२ को 'अपोलो १७' मिसनपछि पहिलोपटक मानवसहितको टोली पृथ्वीको तल्लो कक्ष भन्दा बाहिर निस्किएर चन्द्रमाको मार्गमा पुगेको हो। अन्तरिक्ष अभियानका कमान्डर रिड वाइजमनले खिचेको यो तस्बिरलाई 'हेलो, वर्ल्ड' नाम दिइएको छ, जसमा आन्ध्र महासागरको विशाल नीलो भाग, वायुमण्डलको मधुरो प्रकाश र पृथ्वीका दुवै ध्रुवतिर हरिया 'अरोरा' स्पष्ट रूपमा कैद भएका छन्। यो दृश्यमा पृथ्वी उल्टो जस्तो देखिन्छ, जहाँ पश्चिम सहारा र दक्षिण अमेरिकाको पूर्वी भाग फरक कोणबाट देखिएका छन्।
यो यात्राको एक रोचक पक्ष भनेको अन्तरिक्षयात्रीहरूको उत्साह र सानातिना चुनौतीहरू हुन्। कमान्डर वाइजमनले सुरुमा पृथ्वीको फोटो खिच्न निकै कठिन भएको अनुभव सुनाएका थिए। उनले ह्युस्टनस्थित मिसन कन्ट्रोलसँग कुरा गर्दै भनेका थिए, "यो त आफ्नै घरको आँगनबाट चन्द्रमाको फोटो खिच्न खोजे जस्तै गाह्रो अनुभव भइरहेको छ।" अन्तरिक्षको मनमोहक दृश्य हेर्ने क्रममा यानका चारैजना यात्रीहरू झ्यालमा झुम्मिएका कारण झ्याल केही फोहोर भएको थियो, जसलाई कसरी सफा गर्ने भनेर वाइजमनले ठट्टा गर्दै सोधेका थिए। अन्तरिक्षयात्री क्रिस्टिना कोखका अनुसार पृथ्वी छाडेको करिब २ दिन ५ घण्टा २४ मिनेटपछि आधा बाटो पुगेको जानकारी पाउँदा यानभित्र निकै खुसीयाली छाएको थियो।
अन्तरिक्षयान 'ओरिअन' अहिले पृथ्वीबाट करिब २,२८,५०० किलोमिटर टाढा र चन्द्रमाबाट करिब २,१२,४०० किलोमिटरको दूरीमा रहेको छ। नासाले यो ५४ वर्षको अन्तरालमा प्रविधि धेरै फेरिए पनि अन्तरिक्षबाट हेर्दा हाम्रो 'घर' (पृथ्वी) को सुन्दरता भने अझै उस्तै रहेको बताएको छ। तस्बिरको एक कुनामा चम्किलो बुध ग्रह समेत देखिएको छ, जसलाई नासाले पहिचान गरिसकेको छ। अबको कार्यसूचीअनुसार एप्रिल ६ मा यो यान चन्द्रमाको सबैभन्दा टाढाको भाग भएर गुज्रनेछ र चन्द्रमालाई फन्को मारेर एप्रिल १० मा प्रशान्त महासागरमा अवतरण गर्नेछ। यो सफल भएमा सन् २०२७ को 'आर्टिमिस ३' मार्फत मानिसले पुनः चन्द्रमाको सतहमा पाइला टेक्ने बाटो खुल्नेछ। (बिबिसिकाे सहयाेगमा)
