नेपाल–भारत बीचको जनस्तरको सम्बन्ध नबिगार्न बालेन सरकारलाई चेतावनी

काठमाडौं, वैशाख ३ । सीमावर्ती क्षेत्रका नागरिकलाई अनावश्यकरुपमा बालेन सरकारले दुःख दिन थालेको भन्दै नेपाली कांग्रेसका नेता मनिष कुमार मिश्रले आपत्ति जनाएका छन् ।

नेता मिश्रले बालेन सरकार बनाउन अहोरात्र खट्ने मधेशले उपहार स्वरूप सीमावर्ती क्षेत्रको किसानले पाउनुपर्ने राहतलाई तस्करीमा परिणत गराउन तम्तयार भएको आरोप लगाएका हुन् । सीमा क्षेत्रका नागरिकले भारतबाट एक रुपैयाँभन्दा बढीको सामान ल्याउँदा भन्सार तिर्नुपर्ने व्यवस्थाले सीमावर्ती क्षेत्रका जनता झन् मारमा पर्ने उनले बताएका छन् ।

उनले भनेका छन्, ‘सदियौंदेखि सीमावर्ती क्षेत्रको जनसमुदायले आफ्नो दिनचर्याका निम्ति थोरबहुत सामानहरू ल्याउने लैजाने गर्थे तथा भारतीय नम्बरप्लेटको गाडी राजमार्गसम्म र नेपाली नम्बरप्लेटको गाडी भारतीय रेलको प्लेटफर्मसम्म आवागमनमा सहजता दिइएको थियो । यसको कारण थियो नेपाल भारतको सम्बन्ध विशिष्ट सांस्कृतिक सम्बन्ध हो ।’

सीमावर्ती क्षेत्रका हजारौं हजार परिवारले दुवै देशका विभिन्न गाउँहरूमा सामाजिक सम्बन्ध स्थापित गरेको र नेपाल भारतको सम्बन्ध बेटीरोटीको रहेको बताएका छन् । बालेन सरकारले एक सय रुपैयाँको सामानमा पनि भारतबाट ल्याउँदा भन्सार लागू गर्दा त्यही पार्टीबाट चुनावताका आफूलाई बाहुबली सरह प्रस्तुत हुने नेता चुसम्म पनि नबोली लुकी–लुकी बिरालो सरह बसेको उनको गुनासो छ ।

उनले ‘आश्चर्यको कुरा हो, मधेशबाट जनप्रतिनिधि भएको मान्छे मधेशमा केही दिनदेखि अनाहकमा भइरहेको उपद्रोलाई कसरी टुलुटुलु हेरिरहेका होलान् ?’ भनी प्रश्न गरेका छन् । उनले मधेसीहरू बिना हातहतियार, बिना हिंसा सदियौंदेखि दसगजालाई रक्षा गर्दै आएको र गरिरहने जिकिर गरेका छन् ।

विशिष्ट प्रकारको सम्बन्धलाई खलबलाउन, बिगार्न विगतमा पनि प्रयास भएको तर सफल हुन नसकेको दाबी गरे । उनले यस किसिमको कुचेष्टा जसले गरे आफै समाप्त भएर जाने चेतावनी पनि दिए ।