बुधबार, १३ जेठ २०८३
बुधबार, १३ जेठ २०८३
बुधबार, १३ जेठ २०८३ · राजनीति
काठमाडौं, जेठ १३ । नेकपा (एमाले) की सांसद साजिदा खातुन सिद्धिकीले देशभरका सरकारी अस्पतालहरूमा डायलासिस मेसिनको पर्याप्त व्यवस्था गरी सेवा विस्तार गर्न सरकारसँग माग गर्नुभएको छ ।
प्रतिनिधि सभाको बुधवारको बैठकमा बोल्दै सांसद सिद्धिकीले राप्ती प्रादेशिक अस्पतालमा डायलासिस मेसिनको अभावका कारण बिरामीहरूले ठूलो सास्ती भोग्नुपरेको प्रति सरकारको ध्यानाकर्षण गराउनुभएको हो । मेसिनको अभावले गर्दा बिरामीहरू उपचारका लागि काठमाडौँ आउनुपर्ने बाध्यता रहेको र यसले गर्दा उनीहरूमाथि ठूलो आर्थिक भार थपिएको उहाँले बताउनु भयो । उहाँले बिरामी र उनीहरूका परिवारको यो समस्यालाई मध्यनजर गर्दै देशभरका कुन–कुन अस्पतालमा मेसिनको आवश्यकता छ भन्नेबारे अध्ययन गर्न सरकारलाई सुझाव दिनुभयो ।
सांसद सिद्धिकीले भन्नुभयो, ‘सेवा प्रवाह, नागरिकको भलाइ र अधिकारको संरक्षणको सन्दर्भमा मानव अधिकारको प्रत्याभूति हुनुपर्दछ । तर राप्ती प्रादेशिक अस्पतालमा डायलासिस मेसिनको कमीले बिरामीहरू आर्थिक समस्या झेल्दै काठमाडौं धाउनुपर्ने अवस्था छ ।’
उहाँले सभामुखमार्फत नेपाल सरकारलाई अनुरोध गर्दै उहाँले आगामी दिनमा देशका सबै अस्पतालहरूमा आवश्यकताअनुसार डायलासिस मेसिन उपलब्ध गराउन माग गर्नुभएको छ ।–न्युज एजेन्सी नेपाल
