प्रतिनिधि सभाको शुन्य समयः वैदेशिक रोजगारदेखि स्वास्थ्य र सुशासनसम्मका विषयमा सरकारको ध्यानाकर्षण

काठमाडौं, भदौ २ । सांसदहरूले वैदेशिक रोजगारमा देखिएका विकृति, स्वास्थ्य क्षेत्रको दयनीय अवस्था, अनलाइन ठगी र सुशासन जस्ता जनसरोकारका विविध विषयमा सरकारको ध्यानाकर्षण गराउनुभएको छ । 
प्रतिनिधि सभाको मङ्गलवार बसेको बैठकको शुन्य समयमा बोल्दै सांसद बलावती शर्माले वैदेशिक रोजगारीका क्रममा नेपाली श्रमिकहरूले भोग्नुपरेको समस्याप्रति चिन्ता व्यक्त गर्नुभयो । दैनिक रूपमा नेपालीहरूको शव स्वदेश भित्रिने क्रम नरोकिएको र वैदेशिक रोजगार विभागमा करिव ४६ हजार ठगीका उजुरीहरू अलपत्र परेको भन्दै उहाँले मुलुकी ऐन र वैदेशिक रोजगार ऐनमा तत्काल संशोधनको माग गर्नुभयो । ठगीको अनुसन्धान गर्ने अधिकार जिल्ला प्रशासन वा प्रहरीलाई दिनुपर्ने र अदक्ष नभई सीपयुक्त जनशक्तिलाई मात्र श्रम स्वीकृति दिनुपर्ने उहाँको सुझाव छ । 
स्वास्थ्य क्षेत्रको बेथिति औँल्याउँदै सांसद वसुमाया तामाङले सरकारी अस्पतालमा बिरामीले भुइँमा बसेर उपचार गराउनुपर्ने र पहुँचका आधारमा मात्र सेवा पाउने अवस्था रहेको बताउनु भयो । गरिब नागरिकले अस्पतालमा दुव्र्यवहार सहनुनपर्ने वातावरण सिर्जना गर्न र अस्पतालको व्यवस्थापनमा सुधार ल्याउन उहाँले स्वास्थ्य मन्त्रालयको ध्यानाकर्षण गराउनु भयो । सांसद वासना थापाले कर्णालीका नागरिकले सामान्य औषधि र राहत नपाइरहेको अवस्थामा मन्त्रीहरूको भ्रमण र उपचारका लागि राज्यकोषबाट लाखौँ खर्च हुनु अन्यायपूर्ण भएको टिप्पणी गर्नुभयो । उहाँले राज्यको नजरमा मन्त्री र सामान्य नागरिकको जीवन उत्तिकै मूल्यवान हुनुपर्नेमा जोड दिनुभयो । 
पछिल्लो समय बढ्दै गएको प्रविधिको दुरुपयोग र अनलाइन ठगीका विषयमा सांसद विना गुरुङले सरकारको ध्यानाकर्षण गराउनु भयो । सामाजिक सञ्जालमार्फत सामान अर्डर गर्दा रकम लिएर सम्पर्कविहीन हुने ‘अनलाइन स्टोर’हरूलाई नियमन र कानूनी दायरामा ल्याउन उहाँले माग गर्नुभयो । 
विपद् व्यवस्थापन र स्थानीय पूर्वाधारका सम्बन्धमा सांसद बुद्धरत्न महर्जन र बुद्धिप्रसाद पन्तले आ–आफ्ना धारणा राख्नुभयो । सांसद महर्जनले विपद्को समयमा तत्काल परिचालन हुन सक्ने बजेट र संयन्त्रको व्यवस्था हुनुपर्ने माग गर्नुभयो भने सांसद पन्तले स्थानीय तहमा सडक, विद्यालयका डेस्क–बेन्च र पंखाजस्ता सामान्य पूर्वाधारको अभावले सर्वसाधारण र विद्यार्थीले सास्ती खेप्नुपरेको बताउनु भयो । 
अछामको विकटता र स्वास्थ्य सेवाको अभावबारे बोल्दै सांसद भरतकुमार स्वाँरले बयलपाटा अस्पतालको प्रभावकारिता र दुर्गममा औषधिको उपलब्धता सुनिश्चित गर्न माग गर्नुभयो । अर्का सांसद भरतबहादुर खड्काले दिपायल सिलगढीमा निर्माणाधीन ५० बेडको सरुवा रोग अस्पतालको प्रसंग उल्लेख गर्नुभयो । 
सांसद भरतप्रसाद पराजुलीले सरकारका सकारात्मक कामको समर्थन गर्नुपर्ने बताउनु भयो । प्रधानमन्त्री र मन्त्रीहरू विकास निर्माणको अवलोकनका लागि फिल्डमा खटिएको अवस्थामा आलोचना मात्र गर्नुभन्दा रचनात्मक सहयोगको संस्कृति विकास गर्नुपर्नेमा उहाँले जोड दिनुभयो ।–न्युज एजेन्सी नेपाल