सुनको मूल्यमा गिरावट: एकैदिन तोलामा १० हजार १०० रुपैयाँले घट्यो

काठमाडौं, जेठ २७ ।  स्थानीय बजारमा बुधबार सुनको मूल्यमा ठूलो गिरावट आएको छ। नेपाल सुनचाँदी व्यवसायी महासङ्घका अनुसार बुधबार सुनको मूल्य प्रतितोला १० हजार १०० रुपैयाँले घटेको हो।

महासङ्घले तोकेको नयाँ मूल्य अनुसार आज छापावाल सुन प्रतितोला २ लाख ९१ हजार ८०० रुपैयाँमा कारोबार भइरहेको छ। यसअघि मंगलबार सुन प्रतितोला ३ लाख १ हजार ९०० रुपैयाँमा कारोबार भएको थियो।

सुनसँगै चाँदीको मूल्यमा पनि गिरावट आएको छ। बुधबार चाँदीको मूल्य प्रतितोला १८५ रुपैयाँले घटेर ४ हजार ९२५ रुपैयाँ कायम भएको महासङ्घले जनाएको छ। मंगलबार चाँदी प्रतितोला ५ हजार ११० रुपैयाँमा खरिदबिक्री भएको थियो।