युट्युब ट्रेन्डिङको नम्बर २ मा ‘बाटुलो जुन’को ट्रेलर: भाइटीकाको भोलिपल्टदेखि विश्वभर प्रदर्शन हुने

चलचित्रले आजभन्दा करिब ३५ देखि ४० वर्षअघिको ग्रामीण परिवेशलाई जीवन्त रूपमा समेटेको छ। गाउँको विकास गर्ने र शिक्षाको ज्योति फैलाउने उद्देश्यका साथ एक शिक्षित युवाले गर्ने संघर्षको कथा नै यस फिल्मको मुख्य मर्म हो। नेपाली दर्शकले सधैँ खोज्ने मौलिकता र सरल कथावस्तुको गतिलो झलक ‘बाटुलो जुन’को ट्रेलरमा देख्न सकिन्छ।

कार्यक्रममा नायक अनमोल केसीले आफ्नै पिता तथा अभिनेता भुवन केसीको निर्देशनमा काम गर्न पाउँदाको खुसी र अनुभव साटेका छन्। उनले सह-कलाकारहरू प्रिन्सी खतिवडा र न्यान्सी खड्काले चिसो मौसम तथा कठिन परिस्थितिका बाबजुद देखाएको अथक मिहिनेत र उत्कृष्ट अभिनयको प्रशंसासमेत गरेका छन्।

निर्देशक भुवन केसीको निर्देशनमा बनेको यो चलचित्र आउँदो कार्तिक २६ गते अर्थात् भाइटीकाको भोलिपल्टदेखि नेपालसहित विश्वभरका चलचित्र घरहरूमा एकसाथ प्रदर्शन हुने पक्का भएको छ।